Vacanças Natura còsta Sud de las Lanas
Que trobaratz en aqueth siti totas las informacions toristicas de ueit comunas deu sud de las Lanas : Tarnòs, Ondres, Sent-Martin-de-Senhans, Sent-Laurenç-de-Gòssa, Sent-Bertomiu, Sent-Andrèu-de-Senhans, Biudòs, e Biarròta.
Aqueth territòri, compausat de plajas, de pinhadars, de costalats e de lacas, que’s tròba suu litorau atlantic, entre Lanas e Bascoat (Òssagòr e Cap Berton au nòrd, Baiona e Biàrrits au sud).
Ne trantalhitz pas de contactar lo nòste personau tà tot complement d’informacion sus l’aubèrgament (campatges, vilatges-vacanças, locacions sasonèras, jaças, ostaus, crampas ostalèras...), las activitats (surf, rondaleis, equitacion...), …), la gastronomia e lo plan minjar (restaurants, produits regionaus...), l'animacion, o tot çò qui vs’ajudaré a organizar lo vòste sejorn en Senhans.
La natura deu Senhans : Mar, plajas, pinhadar...
Qu’es ací que s’avia la mei grana cordèra de dunas d’Euròpa. Entre Ondres e Tarnòs, 8 km de plajas que permeten autant plan de clucar los uelhs en s’usclar la pèth, com de’s banhar en familha.
Taus esportius, mantuas escòlas de surf que vs’apreneràn a vs’eslurrar sus las andadas e las èrsas ideaus : qu’èm ací entre de miei deus dus cap-lòcs deu surf europenc : Òssagòr e Biàrrits. Entre dus castèths de sable, los mei joens que poderàn apréner a banhar e a nadar.
La campanha deu Senhans qu’es ua alternança de costalats e de comas, dab enter miei vilatjòts autentics. Pinhadars, bòscs de huelhuts, camps d’indon o de milhòc, verdurèrs, arrius, parcs… que son autan de paisatges atenhedís mercés aus nombrós sendèrs balisats qui permeten la descobèrta d’ua natura arrespectada e entertienuda. Que parlan ací de ruralitat, d’autenticitat e de « tradicion deu plan víver », on la gastronomia es reina…
